ពីធីបុណ្យអុំទូក បណ្តែតប្រទីប សំពះព្រះខែ និង អកអំបុកជាបុណ្យប្រពៃណីជាតិខ្មែរដ៏សំខាន់មួយ ដែលជាប់ព័ន្ធទៅនឹងប្រវត្តិសាស្រ្តរបស់កងទ័ពខ្មែរក្នុងការពារបូរណភាពទឹកដី នៃប្រទេសជាតិទាំងមូល និងជាទំនៀមទម្លាប់ប្រពៃណីរបស់ប្រជាជាតិខ្មែរផងដែរ ហើយក៏ជាមរតកវប្បធម៌ដូនតា ដែលបានបន្សល់ទុកតាំងពីបុរាណកាលមកម៉្លេះ និងមានអាយុកាលជាយូរលង់ណាស់មកហើយ។ សព្វថ្ងៃនេះ ពីធីបុណ្យអុំទូកត្រូវបានប្រជារាស្រ្ត នៃប្រទេសកម្ពុជាយើង គឺតែងតែប្រារព្ធពីធីនេះជារៀងរាល់ឆ្នាំ និងចាត់ទុកជាពីធីបុណ្យប្រពៃណីជាតិមួយដ៏ធំ និង សំខាន់បំផុតក្នុងចំណោមបុណ្យជាតិសំខាន់ៗផ្សេងទៀត។
ដោយឡែកនៅក្នុងខេត្ត ស្វាយរៀង ភូមិភាគខាងកើតនៃប្រទេសកម្ពុជាយើងវិញ ក៏បានប្រារព្ធពីធីបុណ្យអុំទូកប្រពៃណីខ្មែរយើងផងដែរ ព្រមទាំងមានទីតាំងនៃការប្រកួតប្រណាំងនៅ ទន្លេវាយគោ។ ក្នុងពីធីត្រូវធ្វើឡើងនៅថ្ងៃអាទិត្យ ទី ១៤ រោច ខែ អស្សុជ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែ តុលា ឆ្នាំ ២០១៩ ដើម្បីធ្វើការប្រឡងប្រណាំងជ្រើសរើសទូកដែលទទួលបានចំណាត់ថ្នាក់ល្អទៅចូលរួមប្រណាំងប្រគួតប្រជែងផ្តាច់ព្រ័តថ្នាក់ជាតិ នៅរាជធានីភ្នំពេញ
ក្នុងឱកាសអបអរសាទរព្រះរាជពីធីបុណ្យអុំទូកនេះផងដែរ នៅថ្ងៃព្រហស្បតិ៍ ១១ រោច ខែ អស្សុជ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី ២៤ ខែ តុលា ឆ្នាំ ២០១៩ វេលាម៉ោង ៩:០០នាទីនាពេលព្រឹក ធនាគារ ប្រៃសណីយ៍កម្ពុជា ក.អ សាខាខេត្ត ស្វាយរៀង បានចូលរួមជាមួយសាលាខេត្តស្វាយរៀង ក្រោមអធិបតីភាពដឹកនាំដោយលោក ម៉ែន វិបុល ជាអភិបាលខេត្តស្វាយរៀង ដោយនាំយកអាវយឺតចំនួន ៥០ អាវ និង ស្បោងបរិស្ថានចំនួន ៥០ ដល់សាខាខេត្តស្វាយរៀង ដើម្បីឧបត្ថម្ភដល់កីឡាករដែលចូលរួមប្រណាំងទូក។
